ಸೇವೆಗಳು

ಸಮಾಜದಲ್ಲಿ ಸಂಘಟನೆಯ ಮಹತ್ವವನ್ನರಿತು ಸ್ವಾತಂತ್ರ ಪೂರ್ವದಲ್ಲೆ ಹವ್ಯಕ ಸಮಾಜದ ಸಂಘಟನೆಗಾಗಿ ಹವ್ಯಕರ ಸಾಮಾಜಿಕ ಸೇವಾ ಸಂಸ್ಥೆಯೊಂದನ್ನು ಸ್ಥಾಪಿಸಿದ ಹಿರಿಯರ ಆಶಯಕ್ಕನುಗುಣವಾಗಿ ಸಮಾಜಕ್ಕೆ ಅನುಕೂಲ ಕಲ್ಪಿಸುವ ನಿಟ್ಟಿನಲ್ಲಿ ಕಾಲಕಾಲಕ್ಕೆ ಅನೇಕ ಸೇವಾ ಚಟುವಟಿಕೆಗಳನ್ನು ಶ್ರೀ ಅಖಿಲ ಹವ್ಯಕ ಮಹಾಸಭಾ (ರಿ) ಮುಂದುವರಿಸಿಕೊಂಡು ಬಂದಿದೆ. ಸುಮಾರು 90ರ ದಶಕದಲ್ಲಿ ಸಮಾಜದ ವಿವಾಹಾಪೇಕ್ಷಿಗಳ ಅವಶ್ಯಕತೆಯನ್ನರಿತು  ಹವ್ಯಕ ಮಹಾಸಭೆಯದೇ ಆದ ವೈವಾಹಿಕ ಮಾಹಿತಿ ಕೇಂದ್ರವನ್ನು ಪ್ರಾರಂಭಿಸಲಾಯಿತು. ಇಪ್ಪತ್ತು ರೂಪಾಯಿಗಳ ನೋಂದಣಿ ಶುಲ್ಕ ನೀಡಿ ಮುದ್ರಿತ ಅರ್ಜಿ ನಮೂನೆಯಲ್ಲಿ ವಧೂ – ವರರ ಮಾಹಿತಿಯನ್ನು ಭರ್ತಿ ಮಾಡಿ ನೀಡಿದ ಮಾಹಿತಿ ಒಂದು ವರ್ಷದವರೆಗೆ ಊರ್ಜಿತದಲ್ಲಿದ್ದು ನೋಂದಣಿ ಮಾಡಿಸಿದ ಇತರ ವಧೂ – ವರರಿಗೆ ಮಾಹಿತಿ ಪರಿಶೀಲನೆಗೆ ಅವಕಾಶ ಮಾಡಿಕೊಡಲಾಯಿತು. ಪ್ರಾರಂಭದ ಕೆಲ ವರ್ಷ ತ್ರಿಮತಸ್ಥ ಬ್ರಾಹ್ಮಣರಿಗೆ ಪ್ರತ್ಯೇಕವಾಗಿ ನೋಂದಣಿಗೆ ಅವಕಾಶ ಕಲ್ಪಿಸಿದ್ದು ಮುಂದಿನ ದಿನಗಳಲ್ಲಿ ನೋಂದಾಯಿತರ ಹಿನ್ನೆಲೆ ಪರಿಶೀಲನೆಗೆ ತೊಡಕುಂಟಾದ್ದರಿಂದ ಹವ್ಯಕ ಮಹಾಸಭಾದ ಸದಸ್ಯರಿಗೆ ಮಾತ್ರ ನೋಂದಣಿಗೆ ಅವಕಾಶ ಮುಂದುವರೆಸಲಾಯಿತು.

ಇಂದಿನ ದಿನದ ಅವಶ್ಯಕತೆಗಳಿಗನುಗುಣವಾಗಿ ಜಾಲತಾಣದ ಮೂಲಕ ಹವ್ಯಕ ವೈವಾಹಿಕ ಮಾಹಿತಿ ಪರಿಶೀಲನಾ ವ್ಯವಸ್ಥೆಯನ್ನು 2009ರಲ್ಲಿ ಪ್ರಾರಂಭಿಸಿದ್ದು, 2021 ರಲ್ಲಿ ಹವ್ಯಕ ಮಾಂಗಲ್ಯ Appನ್ನು ಕೂಡ ಅಭಿವೃದ್ಧಿ ಪಡಿಸಲಾಗಿದೆ. ಪ್ರಸ್ತುತ ಹವ್ಯಕ ಮಾಂಗಲ್ಯದಲ್ಲಿ ಪ್ರತಿ ವರ್ಷ ಸುಮಾರು ಒಂದು ಸಾವಿರಕ್ಕೂ ಹೆಚ್ಚು ವಧೂ-ವರರ ನೋಂದಣಿ ಆಗುತ್ತಿದ್ದು, ಇಲ್ಲಿಂದ ಮಾಹಿತಿ ಪಡೆದು ಸುಮಾರು 150 – 200 ವಿವಾಹಗಳು ನಿಶ್ಚಯವಾಗುತ್ತಿರುವುದು ಹೆಮ್ಮೆಯ ವಿಚಾರ.

ಹವ್ಯಕ ವೈವಾಹಿಕ ಮಾಹಿತಿ ಕೇಂದ್ರವು ನೋಂದಾಯಿತ ವಿವಾಹಾಪೇಕ್ಷಿತ ವಧೂ-ವರರ ಮಾಹಿತಿ ಪರಿಶೀಲನೆಗೆ ಅವಕಾಶ ನೀಡುವುದರ ಜೊತೆಗೆ, ಕಾಲಕಾಲಕ್ಕೆ ಬೆಂಗಳೂರು ಹಾಗೂ ಇತರ ಕಡೆಗಳಲ್ಲಿ ಹವ್ಯಕ ವಧೂ – ವರರ ಸಮಾವೇಶಗಳನ್ನು ಆಯೋಜಿಸಿಕೊಂಡು ಬರುತ್ತಿದೆ.